wararka

Ehelada Deeqo Dirac oo Sheegay In Ay Jir Dil Iyo Dar Xumo U Geeriyootay!

Taliska Xabsiga dhexe ayaa maalintii shalay saxaafadda u xaqiijiyay iney geeriyootay Deeqo Dirac oo ahayd qof hooyo ah oo sannadkii 2014 lagu xukumay 15 sano oo xabsi milatari ah, kadib markii lagu eedeeyay iney taageerto Xarakada Mujaahidiinta Al-Shabaab.

Gabar ay habar yar u tahay Allaah u raxmado’ e, hooyo Deeqo islamarkaana ka war heysay xaaladeeda tan iyo markii la xiray, ayaa inoo xaqiijisay in geerideeda uu sabab u ahaa jir dil xooggan oo loo geystay iyo dar xumo.

Waxay sheegtay in bilihii ugu horeeyay si ba’an loo garaacay taasoo sababtay iney cuduro ku dhacaan, kuwa kalana kusoo kacaan. “Mar aan booqanay ayaa waxay i tustay gacmaheeda oo runtii aad u guduudnaa, nabarro badanna ay ka muuqdeen jir dil awgiis, wxayna ii sheegtay inuu dhabarku ka daran yahay” ayay tiri’ haweeneyda ehelka la ah Deeqo.

Iyadoo hadalkeeda sii wadato ayaa waxay sheegtay in maalmihii ugu dambeeyay ay xaaladeedu aad uga sii dartay kadib markii uu dhiiggu ka dhamaaday, iyadoo qaraabada loo diiday iney dhiig ku shubaan, waana midda keentay iney geeriyooto.

Inkastoo dhib badna laga maray in DF laga qaado meydka haweeneyda ayaa haddana waxaa xusid mudan in ay janaasadeeda xaadireen dad aad u badan oo bulshada Muqdisho kamid ah, iyadoo sidoo kale ay galbinteeda ay ka qeyb qaateen ugu yaraan 40 gaari.

Deeqo Dirac ayaa maalmihii ugu dambeeyay ee geerideeda muujisay iney dhib weyn ku qabto xabsiga laakin aysan marnaba ka gaabineyn iney Allaah Caabudo, sidaa darteed waxay dalbatay labo kitaab kuwaasoo loo diiday, walow markii dambe si dhib ah loogu geeyay.

Arrintan ayaa kusoo aaday iyadoo sannadkii lasoo dhaafay ay qaar kamid ah xildhibaanada DF sheegeen in dowladdu jir dil xun u geysato dadka maxaabiista ah, kuna khasabto iney qirtaan wax aysan shaqo ku lahayn, waxaa sidoo kale dhowr mar la baahiyay sawirro iyo muuqaalo si qarsoodi ah looga soo duubay jeelasha, kuwaasoo muujinaya dadka oo koronto lagu qabanayo.

Ehelada Deeqo Dirac Alle haw raxmado

2 comments

  1. Allah yaa raxma raaximiin kitaabkeeda midig allaha ka siiyo.

  2. allaha unaxariisto walaasheen deeqo maamo kheyr badan ayay aheyd

Leave a Reply

Your email address will not be published. Required fields are marked *

*