Dowladda Aljeeriya Oo mamnuucay in Indha shareerka lagu qaato xarumaha shaqada.

Wareegta kasoo baxday dowladda Aljeeriya ayaa lagu mamnuucay in Indha-shareerka lagu qaato goobaha shaqada iyo xarumaha dowladda.

Dhamaan shaqaalaha dowladda Aljeeriya gaar ahaan haweenka, iyo dadka imaanaya xafiisyada dowladda ee doonaya in shaqooyin loo qabto ayaa lagu faray inaaney xiran Karin indha-shareerka.

Wareegtada kasoo baxday dowladda Aljeeriya oo uu ku saxiixanyahay ra’iisul wasaaraha dalkaas Axmed Aw Yaxye ayaa lagu faray shaqaalaha dowladda iyo dadka kale iney fuliyaan amarka kasoo baxay dowladda.

Wareegtadan waxaa loo wada diray dhamaan wasaaradaha xukuumadda Aljeeriya iyo xafiisyada dowladda, waxaana dhaqan galkeeda uu ka billaabanayaa maalinta ay soo baxday oo ku beegneyd khamiistii lasoo dhaafay.

Dowladda Aljeeriya ayaa ku andacootay in indha shareerka uu saameynayo arimaha amaanka, muhiimna ay tahay in la aqoonsado qofka, sidaas darteedna ay u mamnuuceen indha-shareerka.

Wareegtadan ayaa waxaa ka horyimid shaqaalaha dowladda, gaar ahaan dumarka ka shaqeeya wasaaradda waxbarashada, kuwaas oo sheegay in arintan ay ka hor imaaneyso rabitaanka shakhsiga.

Inkastoo Aljeeriya aan aadka looga qaadan indha-shareerka, hadana waxay arirntan muujineysaa sida dowladda Aljeeriya dagaalka cad ugu soo qaaday madaahirta diinta islaamka.

You might also like

Leave A Reply

Your email address will not be published.