DEG-DEG: Is rasaaseyn dhimasho iyo dhaawac sababtay oo ka dhacday Maraykanka.

Wararka ay warbaahinta caalamka gaar ahaan kuwa Maraykanka ay qorayaan ayaa sheegaya in is rasaaseyn xoogan oo ka dhacday meel u dhow magaalada Los Angles ay geystay khasaare isugu jira dhimasho iyo dhaawac.

Qof hubeysan iyo Police-ka ayaa dagaal uu dhexmaray, waxaana lagu soo waramayaa in ugu yaraan 3 ruux ay dhinteen, halka  4 kalana ay dhaawac yihiin.

Dagaalka ayaa ka socda goob lagu magacaabo Gable House Bowl, oo hoostagta xaafadda Torrance ee magaalada Los Angles.

Saraakiisha Police-ka ayaa u sheegay dadka ineysan kasoo ag dhawaan goobaha ay xabadu ka socoto, taas oo muujineysa in xaaladdu ay tahay mid adag.

“Waxaan maqlay rasaas xoogan, illaa ugu yaraan 9 xabadood ayaan maqlay oo dhaceysa, taas oo ay is dhaafsanayaan Police-ka iyo qofka weerarka  soo qaaday” ayuu yiri qof goobjooge ah oo la hadlay warbaahinta.

Police-ka ayaa isku dayaya iney soo afjaraan weerarka, balse weli waxaa muuqaneysa iney awoodi la’yihiin.

Dowladda Maraykanka weli kama hadlin cida ay ku eedeyneyso weerarkan, mana jirto cid sheegatay.